(Pi Garoowe) Kulliyada tababarka macalimiinta Puntland ee Garoowe magaceedana loosoo gaabiyo GTEC ayaa waxaa ka dhacday doorashada gudoomiyaha ururka ardayda waxkabarata kulliyadaan
Doorashadaan ayaa waxaa goob joog ka ahaa agaasimaha wasaarada dastuurka iyo dimuquraadiyeynta Puntland, maamulka iyo macalimiinta kulliyada, gudoomiyihii hore ee ururka ardayda iyo ardayda waxkabarata kulliyada GTEC.
Agaasimaha guud ee wasaarada dastuurka iyo dimuquraadiyeynta ee dowladda Puntland oo munaasabada daahfuray ayaa sheegay inuu aad ugu faraxsan yahay ka qaybgalka munaasabadaan, wuxuuna intaas ku daray in tallaabadaani ay tusaale u tahay horumarka Puntland iyo fahanka dimuquraadiyada,
Maamulaha kulliyada tababarka macalimiinta ee GTEC Cabdiraxmaan Sheekhdoon oo ardyada la hadlayey ayaa sheegay in ujeedka barnaamijkaan uu yahay sidii ardayda loogu barbaarinlahaa maamul wanaaga iyo hogaaminta ayna usoo bandhigi lahaayeen fekerkooda.
Sheekhdoon wuxuu ardayda kubooriyey in ay doortaan cidii ay u arkaan in ay hogaaminkadho kana soo bixi kadho shaqada loo igmaday ayna dhowraan xeerka iyo kala dambaynta doorashada.
Gudoomiyihii hore ee ardayda kulliyada TGEC Axmed Bashiir ayaa dhankiisa sheegay in qabashada doorashadaani ay qayb ka ahayd balan qaadyadoodii isagoona musharixiinta ku booriyey in ay shaqada meesha ay gaarsiiyeen kasii wadaan.
Intaas kadib waxaa lagudagalay doorashada oo ka koobnayd hal wareeg ayna ku tartamayeen labada musharax ee kala ah Cabdixakiin Cabdullahi Xirsi iyo Cabdulqaadir Maxamed Cilmi, iyadoona dhiibashada codka kadib gudigu bilaabeen tirinta codadkii ladhiibtey.
Gudoomiyaha gudiga doorashooyinka ee ururka ardyada kulliyada tababarka macalimiinta ee GTEC oo natiijada doorashada kudhawaaqay ayaa sheegay in musharax Cabdixakiin uu helay 93 cod halka Cabdulqaadirna uu helay 125 cod, waxaana sanad jaamacadeedkaan gudoomiyaha ardayda ahaan doona Cabdulqaadir Maxamed Cilmi.
Cabdixakiin Cabdullaahi Xirsi oo tartanka looga guulaystey ayaa sheegay inuu ku faraxsan yahay habka doorashadu udhacday gudoomiyaha cusubna lashaqayn doono.
Gudoomiyaha cusub ee ardayda GTEC ayaa isna dhankiisa mahad ujeediyey musharixii latartamayey wuxuuna tilmaamay intartankii dhamaaday lana gaarey xilligii waxqabadka.
Kulliyada GTEC ayaa ah xarunta kalliya ee soo saarta macalimiinta Puntland waxaana sanadihii lasoo dhaafay ka baxay boqolaal kamid ah macalimiinta waxka dhigta dugsiyada waxbarashada Puntland iyo guud ahaan Soomaaliya.
Hoos Ka Daawo Sawirradii Doorashada.
Puntlandi.com- Garoowe