(Pi Garoowe) Wasiirka wasaaradda shaqada, shaqaalaha, dhalinyarada iyo ciyaaraha dowladda Puntland Cabadiraxmaan Sheekh Axmed Cabdulle ayaa xalay soo gabagabeeyay tartan kubadda cagta ah oo loo qabtay kooxo ka socday dhallinyarada cuslaatay ee Garoowe ku sugan.
Tartankaan ayaa lagu qabtay garoonka casriga ah ee Puntland Fitness Ceneter waxaana ciyaartii ugu dambeysay wada dheelay labo kooxood oo ku kala ciyaarayay magacyada Hilaac electronic iyo warshada rootiga Kismaayo.
Gabagabadii ciyaartaan ayaa kusoo idlaatay 4-1 oo ay guusha ku raacday kooxda Hilaac electronic oo halkaas ku hanatay koobkii lagu tartamayay.
Xaflada lagusoo gabagabeynayay tartankaan ayaa waxaa kasoo qeyb galay wasiirka ciyaaraha, wasiir ku xigeenka xanaanada xoolaha C/Weli Seed Cilmi, gudoomiyaha gobolka Nugaal Cabdi Qani Xaashi Cali, taliyaha qeybta booliska gobolka Nugaal gaashaanle Axmed C/laahi Samatar Layli iyo saraakiil ka socday wasaaradda dhalinyarada iyo ciyaarahaPuntland.
Maamulaha garoonka Puntland Fitness Center C/Qaadir Cali Daahir (Julay) ayaa sheegay tartankaan inuu soo bilowday 22-kii bishii hore ee November, isagoo sheegay in loo qabtay ilaa 10 kooxood oo kala duwan oo ku ciyaarayay magacyada shirkadaha ganacsiga eekuyaala gudaha Puntland.
Mulkilaha garoonkaan C/laahi Sheekh oo ka hadlay xaflada ayaa sheegay tartankaan inay ugu galeen sidii ay waqti usiin lahaayeen dhalinyarada cuslaatay si ay garoomada ugusoo laabtan oo ay u helaan jimicsi iyo jirdhis, Wuxuuna intaas ku daray inay mar walba diyaar u yihiin inay sii wadaan tartamada caynkaan oo kale si ay dhallintu niyada ugu hayaan isboortiga dalkooda.
Mas’uuliyiintii kala duwanaa ee ka socday dowladda ee ka hadlay xaflada ayaa si isku mid ah usoo dhaweeyay tartankaan waxayna aad ugu mahad celiyeen maamulka garoonka oo ay ku ammaaneen inay dhalinyarada u sameeyeen goob ay mudadaashaan oo ay kusoo bandhigaan xirfadahooda kubadeed, Waxayna intaas ku dareen in mustaqbalka dhow garoonkaan ay kasoo bixidoonaan ciyaartoy caalami ah oo waxtar uleh dalka.
Wasiirka ciyaaraha iyo dhalinyarada C/raxmaan Cabdulle le ayaa koobka gudoonsiiyay kooxdii ku guulaysatay ee Hilaac, waxaana sidoo kale abaal marino la gudoonsiiyay kooxda labaad ee tartanka iyo shakhsiyaad kale oo saamayn wanaagsan kulahaa tartank sida. laacibka tartanka, gool dhaliyihii tartanka, kooxda akhlaaqda iyo kuwo kale.
Waa tartankii labaad ee lagu qabto garoonka Fitnes tan iyo markii la aas aasay garoonkaan bishii Julay ee sanadkaan.
Halkaan ka daawo Sawirada.
Puntlandi.com- Garooowe