(Pi Garowe) Jaamacadda Bariga Afrika qeybteeda magaalada Garowe ayaa maanta furtay barnaamij waxbarasho oo labo sano oo lagu baran doono maaraynta kheyraadka dabiiciga ama barashada deegaanka.
Barnaamijkaan oo ay galinayso Midowga Yurub oo usoo maraya Hay’adda Care International ayaa la shaaciyay inay ka faa’idaysandoonaan 30 arday ah oo lagasoo kala xulidoono dhammaan gobolada Puntland.
Munaasabad lagu furay barnaamijkaan oo lagu qabtay xarunta jaamacadda ee Garowe ayaa waxaa kasoo qeyb galay mas’uuliyiinta ka socday hay’addaha dowladda, quburo ku xeeldheer arimaha deegaanka, wakiilka hay’adda Care ee Puntland iyo tiro arday ah oo doonaysa inay barnaamijkaan ka faa’idaysato.
Dr Cabdi Qani Axmed Faarax oo ah maamulaha machad lagu magacaabo Maaraynta deegaanka oo lagu aas aasayo waxbarashadaan labada sano ayaa sheegay inay ardayaan barandoonaan casharada kala ah barashada daaqa iyo duur joogta, barashada maaraynta Keymaha iyo barashada deegaanka.
Dr Cabdi Qani ayaa sheegay baahi machadkaan inay ka timid cilmi baaris deegaan oo la sameeyay. Wuxuuna sheegay ardaydaan marka ay dhameystaan daruustooda in loo diyaarindoono shahaadada koowaad ee jaamacadda.
Gudoomiyaha jaamacadda Afrika Sheekh Maxamuud Xaaji Yuusuf oo ay jaamacadiisa hurmuud u tahay waxbarashadaan ayaa sheegay muhiimada deegaanku inay taabanayso dhinac walba oo ah nolasha Aadanaha isagoo sheegay inay jaamacadda waqti ku bixisay hirgalinta machadkaan iyo manhajkiisa barashada deegaanka.
Cali Axmed Godane oo ah agaasimaha hay’adda Care ee Puntland ayaa sheegay mustaqbalka dhow machadkaan inuu noqondoono halka lagasoo saaridoono dhallinyaro aqoon fiican uleh deegaanka islamarkaana fidindoona wacyi galinta. Wuxuuna dowladda ka rajeeyay inay shaqaalaysiindoonto dhallinyaradaan.
Wasiirka beeraha iyo waraabka Puntland Cabdi Ismaaciil Boos oo ugu dambayn hadlay ayaa sheegay haddii aan muhiimad gaar ah lasiin ilaalinta deegaanka inay nolasha bini’aadamka qatar ku sugan tahay.
Daawo Sawiradda;-
Puntlandi.com-Garowe.
